رمضـــــان رابعه ابتدائـــى

اعيش الاجواء الإيمانية والروحانية لرمضان هذا العام بدرجة عالية جدا واحتفاء منى بقدوم هذا الضيف الكريم احببت ان اهنكم بحلوله قبل الجميع فكل عام وانتم بخير ويارب يجعلكم من عواده , داعيا الله ان يبلغنا رمضان وان يعيده علينا اعواما عديده وان يتقبل منا ومنكم الصيام والقيام وقراءة القرآن , وتمنياتي لرمضان القادم ان يأتي كما هو عادته دائما الى الشعوب الإسلامية عامة بالخير واليمن والبركات وأن يأتي بالفرج لشعوب الثورات العربية خاصة واخص بالذكر الشقيقة الغالية سوريا وان يفك اسر المسجد الاقصى فيه اللهم امين ,

هذا ما اتمناه في رمضان القادم ولكنى احببت اليوم ان اتكلم عن رمضان رابعه ابتدائي ؟
رمضان رابعه ابتدائي ؟
اه رمضان رابعه ابتدائي .
 واشمعن يعنى رمضان رابعه ابتدائي ؟ ( سكوت فابتسامة فتفكير  )

طب اقول لهم ولا ربك حليم ستار?
 يلا  يا عم اتوكل على الله وقول وارجع تانى للأيام الجميلة دي

بصوا بقى يا جماعه رمضان رابعه ابتدائي ده كان أول رمضان اصومه كامل ( يااادى الكسوف )

سامعك سامعك , بتقول يعنى قبل كده كنت بتفطر ؟
 ايوه يا سيدى قبل كده كنت مبقدرش اصوم رمضان بالكامل يعنى كان لازم ينضرب يوم أو يومين كده فى الشهر , واليوم أو اليومين دول بقى كان ليهم قصص فى منتهى البراءة والجمال ( ومحدش يقولى احكيهم كفايه احراج لحد كده ) .
في رمضان رابعه ابتدائي امضيت الشهر كله والحمد لله بدون ما افطر ولا يوم واحد وده كان فى حد ذاته انجاز بالنسبالى ,

فى رمضان رابعه ابتدائي كان ابويا الله يرحمه يصحينا للسحور انا واخواتى علشان نلاقى امى رحمة الله عليها مجهزه السحور ( جبنه وفول غالبا وخيار , ماكنش لسه اختراع الزبادي وصل بلادنا ) وبعدين اروح الجامع اصلى الفجر وبعد الفجر فى الجامع لحد ما تطلع الشمس وبعدين ارجع للبيت بسرعه البس لبسي واطلع على المدرسة ,
 بعد المدرسة كان اليوم بيكون فى منتهى الجمال بين الصلاة وقراءة القرآن ,
 و يا ترى ختمت القرآن كام مره فى رمضان ؟

والله على الاحساس بحلاوة اغانى رمضان القديمة ( رمضان جانا لعبد المطلب ومرحب شهر الصوم و اهوه جه يا ولاد  )
وطبعا قبل الاذان الشيخ الشعراوي ( بصراحة ماكنتش بفهمه فى الوقت ده بس بحس انه راجل طيب و وشه بشوش )
وقرآن المغرب قبل الفطار وجمال صوت الشيخ عبدالباسط والمنشاوى وكنت فى الوقت ده بنتظر المغرب بره البيت عندنا اسمع الاذان وأول ما الاذان يأذن اجرى بسرعة للفطار ( بلح  عجوه و خشاف وقمر الدين )  ,
 كانت ايام جميله لما كنا بنفطر كلنا والتلفزيون بيعرض بوجي وطمطم و يا ترى السنه دى هيكون بوجى وطمطم شكله ايه ؟ بوجى وطمطم مع الفانوس السحري زي السنه اللى فاتت ولا مع الفيل فلافيلو , يااااااااه
أما بعد العشاء فما احلى صلاة التراويح فى المسجد اللي مليان على اخره .
وارجع علشان الكنافه والقطايف اللى مستنيين وما احلاهم قدام برنامج بدون كلام أو مسلسل الف ليله وليله أو الفوازير  والله على شكل الفوانيس القديمه قبل ما تتكلم وتتحرك  والاطفال مبسوطين وسعداء بيها فى الشوارع ,

كان رمضان جميل واحنا معزومين عند جدتى وجدى ومعانا كل اهالينا , واللعب مع ولاد اخوالى كوره بالليل كانت ذكريات جميله  ده كان رمضان رابعه ابتدائى أول رمضان صمته بالكامل.

وكفايه لحد كده لأنى هغرق فى الذكريات ودموعي بدأت تسبقني وانا نفسى يكون الكلام مفرح وليس مبكى تيمنا بقدوم هذا الضيف الغالى ,

 افتح قلبك واتكلم عن رمضان وانت صغير احب اعرف ثقافة وطنك فى رمضان  وكل عام وانتم بخير