الثلاثاء، 19 يونيو، 2012

فـردة حذاء


غصت في  بحر التفكير ذات ليلة لعلى اخرج بالدر الكامن من بطنه وظللت ابحث وابحث في عناء وخرجت بعد التعب بفردة حذاء ,
تتبسمون الان من كلماتي ولكنى اصدقكم القول ان التفكير احيانا يلقى اليك بالغريب من القول والفعل واحيانا بما هو مضحك واليكم ما خطر على بالى من اسئلة خفيفة وطريفة عبر الايام الماضية  واعذروني في عرضها بالعامية المصرية فلا اجد اجمل منها لهجه للتعبير عما يدور بخلدي .

1)    هما ليه بيسموا الشخص اللى بيشم ريحة السجاير وهو قاعد مع ناس مدخنين انه مدخن سلبى ؟ , هل ده معناه ان اللى بيدخن السجاير نفسه بقى يبقى مدخن ايجابى ؟

2)    دايما تلاقى معظم بلدان العالم تترجم للانجليزيه لكلمه مشابهه يعنى تلاقى مثلا فلسطين بقت Palestine  أو  السودان تبقى sudan  أو سوريا تلاقيها Syria  ولبنان Lebanon  , اشمعنى مصر بتتحول ل Egypt  ألا هو يعنى ايه Egypt  ؟

3)    فجاه مره واحده وانت ماشى فى مكان زحمه تلاقى بنى ادم راح معدى من جنبك وراح خابطك فى كتفك بكتفه , تبص ناحيته تلاقيه يقولك , معلهش !!!!!!! , ككلمة اعتذار منه يعنى ؟  طيب هو يعنى ايه معلهش ؟ ومين اللى معلهش ومين اللى عليه ؟


4)    وبمناسبة يعنى ايه معلهش ؟ احب اسأل عن معانى بعض الكلمات اللى بنستخدمها فى معجمنا نحن كمصريين زى  ,
·         يعنى ايه تيل ؟ ( لا عيل ولا تيل )
·        وخد بالك أو خلى بالك , ودى بقى كلمه بنقولها نحن المصريين لما نحب نحذر حد من خطر ما ؟ طب لو عرفت ان البال هو الخاطر يبقى يعنى ايه خد بالك ؟ وبعدين اخد ولا اخلى ؟ هتحيرونى ليه بقى !!

5)    تلاقى البعض يكتب مقال ويقول فيه وفى ضوء الموضوع وتلاقى هو هو نفس الشخص كاتب مره تانيه وفى ظل الموضوع !!!!!!!!! طيب متى استخدم فى ضوء ومتى استخدم فى ظل ؟  ولا ده متوقف على المكان الى هو كان واقف فيه ؟

6)    دائما ما تسمى المدن الجديدة في مصرنا الحبيبة بتواريخ النصر في مصرنا الحديثة  فتجد مدينة العاشر من رمضان أو مدينة السادس من اكتوبر ولكنى دائما ما اقف حائراً أمام مدينة 15 مايو بحلوان أو كوبرى 15 مايو ؟ فلا اعلم لهذا التاريخ أي اهميه وعندما بحثت عنه وجدت كل 15 مايو تواريخ لا توحى بالنصر , ولا هو تاريخ جه على بالهم وخلاص ؟

والى لقاء في شطحات اخرى  



هناك 10 تعليقات:

  1. حلوه هالخربشات بجد

    حتى تساؤولات بسيطه وعميقه


    معلهش, هههه

    ردحذف
    الردود
    1. حتى انتى يا ام عمر هتقولى معلهش

      خدى بالك المره الجايه ههههه

      تحياتى لتشريفكم الكريم ام عمر

      حذف
  2. حقيقة أسئلة عميقة رغم بساطتها ورغم استخدامنا لها بشكل متكرر دون الوقوف عليها ...
    فلسفة ونظرة عميقة لديك..
    في ضوء الموضوع وظل الموضوع استخدامات مختلفة لمن يستخدم اللغة بشكل دقيق " ضوء الموضوع " تستخدم عندما نبني نتائج واستنتجات على أسس وأسباب واضحة سبق ذكرها في الموضوع فنقول في ضوء الموضوع ...أما ظل الموضوع فهي تعني كلية الموضوع باعتباره وحدة كاملة لها ظل معين نصل من خلالها لنتيجة محددة

    ***ما لفت انتباهي هو 15 مايو... 15 مايو هو ذكرى النكبة ذكرى تهجير الشعب الفلسطيني من أراضيه عام 1948 م ...!!

    لفتة مميزة
    أشكر دقة نظرتك

    ردحذف
    الردود
    1. شكرا جزيلاً لزينة فلسطين على المعلومات اللغويه القيمة .
      اما 15 مايو فلم ارد زكر انها كلها تواريخ نكبه ونكسه وازيدك من الشعر بيتاً ان فى 15 مايو 1980ايضا اعلنت اسرائيل أن القدس هي عاصمة إسرائيل إلى الأبد, وهو ما زاد حيرتى فى تسمية مدن وكبارى فى بلدنا بهذا التاريخ

      حذف
  3. ارجو حذف الكلمات التأكدية عند التعليق للتسهيل على المعلقين...

    أشكرك

    ردحذف
    الردود
    1. سيراعى ذلك مستقبلا باذن الله
      شكرا زينه

      حذف
  4. ههههههههههههههههه جمييييييييييييييل

    اسئلة مشروعه وكلها تقريبا ليها اجابات منطقية ماعدا 15 مايو الحقيقه ومعهلش اللى بنقولها فى العامية معلش ممكن تطلع اصلها فرعونى زى كتير من الكلمات المتحورة مع الوقت تحياتى على الشطحة اللطيفه جدا

    ردحذف
    الردود
    1. اهلا بك richard catheart 22 فى بيتى الصغير
      شرفت بزيارتك واسعدنى تعليقك
      تقبل تحياتى

      حذف
  5. المدخن السلبي لانه بياخد الدخان مش بيطلعه زي ال بيدخن بسيجارة اتجاه معاكس يعني
    طيب هو يعني ايه كايرو وايه علاقتها بالقاهرة
    معلهش .. يعني ما عليهوش عتب وعتب ده مش بتاع الباب ال بيتحط عشان تحط عليه الطوب ده بتاع اللوم وما تسالنيش يعني ايه لوم
    تيل ده بقي جمع تكسير يعني مالوش معني
    واخدلي بالك يعني ركز معايا تيك يور اتنشن
    اكيد ضوء الموضوع بالليل وضله بالنهار في الشمس القمر مش بيدي ضل بيدي ضلمه
    اكيد 15 مايو ده كانت الثانويه العامه بتبدء فيه واما اتغيرت بقي 10 يونيه محبوش يلخبطونا او ناخد بالنا
    ورجع بقي فرده الحذاء دي وبطل غوص احسنلك واحسنلنا كلنا
    تحياتي

    ردحذف
  6. ههههههههههههههههههههههههه
    كنت لا اعرف انك قد قمتى بالتعليق على هذا الموضوع ولكنى وبلهجة كده بقى مصرى هفطس من الضحك , بجد تعليق جامد جدى
    بس هقولك ايه ما انا رميت فردة الحذاء وجيت فى يوم قاعد رايق كده قلت اغوص تانى واصطاد يمكن ربنا يرزقنى بحاجه عدله بس للاسف طلعتلى حورية بحر

    بجد سعيد جدا انك شوفتى البوست ده

    تحياتى ودايما منورانى يا وصف

    ردحذف

كلمات من نور تخرج من احباب كالزهور