الأربعاء، 8 يونيو 2011

صباح الخير يا بلادى

صباح الخير على كل اللى ممكن يقرأ الكلام ده صباح الخير على احلى واجمل بلد فى الدنيا , انا قلت هكمل المشوار زى ما ابتديته وقلت برضه هبدأ اكتب واقول كل اللى جوايه يلا نقول بسم الله ونبدأ بالحاجات اللى شغلانى النهارده فى يومى
اول حاجة يا جماعه انا نويت انى ابعد بالمدونه دى عن امورى الشخصية وانى اخليها بس للامور العامه واللى تهم البلد والناس واللى ممكن يبقى ليها تأُير على مصرنا بس برده ممكن اكتب عن الامور الشخصية اللى هيكون ليها تأُير عام , وخلونى ابدأ
*  فين بلال فضل يا جماعه فى المصرى اليوم , من يوم 2/6/2011 وهو ما بيكتبش يارب المانع يكون خير
* الاستاذ . كما يحب البعض ان يطلق عليه محمد حسنين هيكل يطلعلنا كل يوم بتصريح شكل يعنى يوم يقولك فى الاهرام انا عندى مستندات تؤيد امتلاك مبارك وعائلته لمليارات الدولارات واول ما المجلس العسكرى يستدعيه علشان يشوف المستندات دى يقولهم هيييييييه ضحكت عليكوا انا بس سمعت الكلام ده من المحطات الاخباريه الاجنبيه ,وكمان كلامه اللى يحرق الدم اللى بيقول فيه ان مبارك لا يجب ان يحاكم جنائيا بل يجب ان يحاكم سياسيا  , طيب والعبارة اللى مات فيها اكتر من الف واحد وهو بيحتفل بكاس افريقيا فى الاستاد , طب والمبيدات المسرطنة اللى جابتلنا المرض والجشع والغباء ,  طب وقطار الصعيد اللى اتحرق ,  طب وقصر ثقافة بنى سويف اللى صمم يخلى بعده فاروق حسنى وزير للثقافه , طب ايه ولا ايه ولا ايه , واللى زاد النهارده بقى فى موقع محيط بيقول النظام المصرى ادرج صفقة الغاز فى اتفاقية كامب ديفيد وان الاستاذ هيكل يمتلك وثائق تؤكد مش عارف ايه وحبة كلام كده لا ليه لون ولا طعم ولا رائحة  , ارحمنا بقى يا حاج حسنين من كلامك الفاضى ده وتزييف التاريخ اللى انت عمال تحكى فيه ده ,
والى لقاء قريب باذن الله

الاثنين، 6 يونيو 2011

بسم الله

بسم الله بسم الله احلى كلام اتعلمناه نبدأ دايما بسم الله
حبيت يكون اول كلامى على المدونه هو بسم الله علشان ربنا يجعل لسانى دايما لا ينطق الا بما يرضيه 
دى اول مرة اكتب فيها مدونة اول مرة احس انى عايز اقول كل اللى جوايا من غير ما حد يمنعنى من ابداء رأيى , مدونتى عنوانها نفسى اكون افضل , اخترت الاسم ده علشان فعلا انا نفسى اكون افضل بالعكس انا مش نفسى انا بس اللى اكون افضل انا نفسى كل الناس اللى حواليه كل الناس , اللى تعرفنى , كل الناس اللى بتقرالى دى انها تكون افضل , نفسى فى مكان افضل وفى بيئة افضل وفى حياة افضل فى مصـــــــــــــــــــــــــــــــــــــــــــــــــــــــــــر ام الدنيا تكون الافضل , بحبك والله يا بلادى بحبك وحبك بيجرى فى كل شريان ووريد جوايا وعلشان انا نفسى بجد نكون الافضل قررت انى ابدا بنفسى ويارب وادعولى اقدر اكمل الطريق ولو ما قدرتش فبجد انا سعيد جدا بالتجربه , جايز يكون كلامى مش منسق جايز اكون فى سنة اولى تدوين لكن بجد وعلى اى حال انا هحاول وهحاول وهحاول لحد ما اكون الافضل 
والى لقاء قريب باذن الله