الأربعاء، 5 ديسمبر 2012

بعض من أنا



كان هدفى من هذه المدونه ان اعمل على تحسين نفسى بشكل مستمر فى كل نواحى الحياه وأظن انني بفضل من الله قد تحسنت قليلا , راجيا منه سبحانه ان يمن على بأن اتقدم الى الامام خطوات اخرى , احببت هنا فى هذه المساحه ان اتكلم عن بعض العادات التى انفرد بها ولا اعتقد ان كثيرا منكم من الممكن ان يتمتع بهذه العادات.
(بس بس بس ايه يا عم الكلام الكبير ده الناس تفتكرك كده كاريزما ولا حاجه , ادخل فى الموضوع علطول وما تخنقناش )
حاضر يا سيدى , ومعلش يا جماعه اصل الجلاله اخدتنى شويه  :)  
الموضوع ببساطه اننى غريب فى بعض الطباع والعادات التى اود ان ابوح لكم بها لعلى اجد عندكم العلاج  فبعضها مضحك والاخر محزن ولكنها شئت أم ابيت : انا !!

 شخص ينام بصعوبة جدا يعنى بالمصري كده ما بيهونش عليه انام , احب دايما اكون صاحي ومش بنام غير لما النوم يغلبني غصب عنى , وعدد ساعات نومى بأي شكل من الاشكال لا تتعدى 6 ساعات حتى ولو مريت بيوم طاحن , برده بنام 6 ساعات بس , لأ وممكن بالتقسيط كمان ( تقسيط ؟!!! ) اااايون تقسيط  : يعنى ممكن انام بالنهار بعد الرجوع من الشغل ساعتين مثلا , اذن يتبقى لى 4 ساعات بس بالليل وهكذا .

المصيبة الثانية لو نمت و أي حاجه قلقتنى أو حد صحانى من النوم لأى سبب فى اى وقت بيكون صعب جدا بل واقرب للمستحيل انى اعرف انام تانى فى وقتها حتى ولو كنت لسه نائم من دقائق.  

الغريبه التالته بقى فى حياتى انى لو لبست شراب ( جورب ) فى رجلى الصبح قبل ما انزل الشغل وما عجبنيش لأى سبب مثلا للونه أو لانه مضايقنى بيكون صعب جدا عليه اخلعه والبس واحد غيره لأن رجلى بتحس ان الشراب الجديد اللى هلبسه  بيخنقها جدا .

احب مشاهدة افلام الكارتون بشده وليس ذلك للاثارة والتشويق الذى تحتويه ولكن لكونها تأخذنى الى زمان كنت فيه لا احمل بين جنباتى هموما او متاعب  بل كانت البراءة والضحكه الصافيه هما كل حياتى .

وهذه اعتقد ان البعض يشاركنى فيها : فانا لا اقود سيارتى الا وانا لابس حزام الامان , والكلام ده بقى من قبل ما يطبقوا قانون المرور عندنا فى مصر,  حتى فى ايام بعد الثورة والان حيث اصبح الجميع لا يهتم بان يربط الحزام , ماذلت مصمما على عادتى فعندما اقود السياره بدونه احس ان شئ ما ينقصنى , بل واحيانا اربطه دون ان اشعر واجدنى عندما اصل الى نهاية رحلتى اسأل نفسى ( هو انا ربطت الحزام ده ايمتا ؟ ).

وماذال بداخلى الكثير اتمنى ان يأتى اليوم الذى ازيحه عن صدرى كما ازحت هؤلاء , كما اتمنى الا يشاركنى احد فى هذه العادات الغريبه  ...  ويشفينى :)


 

هناك 12 تعليقًا:

  1. منشترك بأكتر من خاصيه
    انا نومي قليل وخفيف,, يعني مجرد حدن يشعل الضو بصحى وصعب ارجع انام

    الكرتون اصلاتن أحلى من العادي كمان ههههه

    يسعد اوقاتك

    ردحذف
    الردود
    1. شكرا لزيارتك التى تسعدنا ام عمر
      اما خواصى المميزه فاجدنى اشترك مع البعض فيها ولكن لن تجديها مجمعه فى شخص واحد ولسه عايش ههههههههه

      سيبك انتى مفيش احلى من الكارتون هههههههه

      تحياتى اختنا العزيزه

      حذف
  2. مشتركة في الكارتون ..بحبه جداا..
    فيه كارتون مازال ف دمي زي كونان وانا واخي^_^

    ردحذف
    الردود
    1. انا بقى كنت عاشق لتوم و جيرى والكابتن ماجد هههههه
      تحياتى ياسمين

      حذف
  3. اعجبني ما كتبت اخي الكريم
    من الطبيعي ان يكون لكل منا طباع خاصة به واخرى يشاركها اياه الاخرون
    و اشترك معك في الصفة الثانية ...
    و بالنسبة للاخيرة فهي صفة عزيزة فيها كل الخير لك و سلامتك فلا تكترت بالاخرين
    تحياتي

    ردحذف
    الردود
    1. يشرفنى دائما وجودك هنا عبر بابى المتواضع استاذنا ويشرفنى اكثر ان اتابعكم فى صدى كيسان
      اما الصفات فهى غريبه ولكنها فى احيان كثيرة قد تكون مرهقه
      تحياتى

      حذف
  4. اية المشكلة انك تكون متميز ومختلف ببعض العادات الخاصة بيك
    دى حاجه جميلة
    انا زيك فى موقع الكارتون ده

    دمت بخير :)

    ردحذف
    الردود
    1. كبير اوى موضوع متميز ده يا دينا انما مختلف ماشى
      يبدو ان المدونين كلهم بيحبوا الكارتون

      دمتى بكل خير اختنا

      حذف
  5. عادى يا محمد
    مش تخاف انت مش عيان أوى
    اشرب مج كبير نسكافيه وانت هتبقى آخر تمام
    بس لو سمحت ماتنساش حق الكشف

    ردحذف
    الردود
    1. بصى يا دكتورة ياريت يبقى فيه جلسات لان الصفات والعقد لم تنتهى عند هذا الحد الذى قرأتيه بالاعلى وانما فيه بلاوى تانيه ,,, ولا اقولك انت مش حجزتى لنا معاكى فى المستشفى .. يبقى خلاص بقى ههههههههه

      تحياتى

      حذف
  6. صباح الغاردينيا محمد
    :)
    عاداتك جميلة بس صعوبة النوم دي مزعجه
    لانه اي حد ممكن يزعجك ماترجعش تنام تاني
    وبطل تلبس شراب مش عاجبك ههههه
    الجميل انك بتربط الحزام :) "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
    الردود
    1. دائما ما يتميز حضورك بالرقى اختنا
      بس اعمل ايه فى عاداتى ريماس ؟!!!
      تحياتى

      حذف

كلمات من نور تخرج من احباب كالزهور