الأربعاء، 30 نوفمبر، 2011

امـــــــــــــــــــــى

احترت ابدأ كلامى فى المقال ده ازاى بس قولت انا هسيب الكلام يخرج زى ما انا حاسه لانه عن اغلى انسانه فى حياتى


كنت صغير طفل عنيد وكانت الصدر الحنين اللى بياخدنى فى حضنها ,ياما لعبنا وضحكنا فى حضنها وبعد كل يوم طويل من اللعب والتنطيط وتوسيخ هدومى فى الشارع ييجى وقت التشطيف " لازم امرشك علشان تنضف " 
 كبرت ودخلت مدرسه وكانت فرحتها انها تشوفنى كل يوم وانا بذاكر واعمل الواجب وأد ايه بتكون سعيده وتوزع شربات لما اطلع الاول ع المدرسه , وكبرت وكبرت مشاكلنا معانا وعاشت لينا ام واب ما تعرفش فى الدنيا غير انها تخلى بالها مننا ومن حياتنا ,
وجات مرحلة الثانويه العامه وعشت فيها ايام عصيبه عاشتها معايا وعدت الايام وبقيت فى جامعه وهى عمرها ما غيرت عادتها من انها تسمعنى بكل انصات وانا بتكلم عن حياتى وعن يومى ازاى قضيته وزمايلى وزميلاتى فى الجامعه والمدرسه بدون ما تشوف كل الناس اللى انا بحكى عليهم دول,
واتخرجت من الجامعه وبدأت رحلة الشغل ثم الجواز والعروسه وكانت بجد غير كل الامهات عمرها ما كان فيه بينها وبين زوجتى غيره على الرغم من بعدى عنها بعد كل سنين التربيه الطويله دى واد ايه كانت فرحانه لفرحى وعدت الايام وربنا رزقنى باغلى طفل فى الدنيا وبدأت تعيش شعور الجده " تيته " وعمر ما تصورت  انها ممكن يكون حد غالى عليها كده زى ابنى , لقيتها بتمنحه كل اللى كان حتى محرم عليه انا نفسى انى اعمله او ادخله ,  
و بعد ما اتجوزت بسنه او اتنين عرفت انها مريضه اه مريضه , يااااااااااااااه  اد ايه الست دى اتحملت كل الآلآم دى علشان ما تحسسناش باى الم ,
اد ايه فرحتها لما كنت استضيفها فى بيتى لايام تغير فيهم جو وتشوف فيهم اماكن , جايز تكون بالنسبالى عاديه لكن بالنسبه ليها كانت اماكن واشياء جميله ما شافتهاش فى حياتها , وكان مع زيارة السيده وسيدنا الحسين والسيده عائشه دعوه جميله تفتح باب الرزق ,


دى كانت امــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــى


ما تتعجبوش انى طولت فى الكلمه أوى اصلها بجد وحشتنى أوى وحشنى ارددها أوى " يا ماما , ماما , امى " 
رحل عنى نور حياتى وضيها رحلت وارتاحت من الامها وتعبها رحلت الورده الجميله الزكيه عن دنيتنا رحلت لعالم ان شاء الله افضل واجمل , 
  
 21/6/2011 تاريخ لن انساه فى حياتى فهو تاريخ وفاة امى


 ان العين لتدمع وان القلب ليحزن وانى على فراقك يا اماه لمحزون , وانا لله وانا اليه راجعون اللهم ابدلها دارا خير من دارها وولدا خير من ولدها واهلا خير من اهلها واغسلها اللهم من خطاياها بالماء والثلج والبرد واجعل قبرها روضه من رياض الجنه واسكنها الفردوس الاعلى مع النبيين والصديقين والشهداء والصالحين وحسن اولئك رفيقا , اللهم امين


وحشتينى اوى يا امى


 ولا اراكم الله مكروه

ليست هناك تعليقات:

إرسال تعليق

كلمات من نور تخرج من احباب كالزهور